Phai Synod Bookroom hi Presbyterian Church of Myanmar, Phai Synod hnuaia Literature rawngbawlna pawimawh tak pakhat a ni a. Tahan, Kalaymyo-a Phai Synod Office-ah hawn a ni a. Synod leh kohhran mipuite tana Kristian lehkhabu, Pathian thu zirna lehkhabu leh rawngbawlna atana mamawh leh tangkai lehkhabu ro tling leh thar lam chi hrang hrang dah thin a ni.

A tir lamah chuan Bookroom rawngbawlna hi Literature and Bookroom Committee enkawlna hnuaiah kalpui a ni a. Kum 2004 atang khan “Literature and Bookroom Committee” chu “Synod Communication” tia hming thlak a ni a. Chuta tang chuan literature, publication leh Bookroom rawngbawlna chu Synod Communication hnuaiah mumal zawka kalpui a ni. Bookroom hi Phai Synod Office hnuaia awm niin, Bookroom Manager-in a enkawl thin a. Tunah erawh Bookroom Manager tih thin kha Book Seller tia thlak a ni ta a ni.

Phai Synod Bookroom chu sumdawnna mai ni lovin, Synod rawngbawlna pawimawh tak zinga mi a ni a. Mizo, Burmese leh English tawnga ziak lehkhabu tha tak tak dah niin Kristian literature lam a tam deuh ber a. Bible leh Kristian lehkhabu chauh ni lovin, office supplies, school stationery, record forms leh Kohhran mamawh dangte pe chhuakin Kohhran, Pastor Bial, Presbytery leh member-te rawng a bawl mek a ni.

Phai Synod Bookroomin a tum ber chu Kristian lehkhabu tha hmanga Pathian thu hriatna tihpuna sawh ngheh nan te, Kristiante Pathian thu zirna tihchangtlun te, leh Kohhran leh khawtlang mamawh phuhruksak hi a ni. He rawngbawlna hi Presbyterian Kohhran-in Wales Mission leh Mizoram Presbyterian Kohhran atanga a dawn ro hlu tak pakhat a ni a, chu chuan Phai Synod hmasawnna leh rawngbawlna a tanpui nasa hle bawk a ni.